أطباق الفراخ من المطبخ التايلاندي والمكسيكي

هنكمل مع بعض وصفاتنا ، وهندخل مع بعض المطبخ التايلاندي والمكسيكي؛ علشان نعرف أطباق جديدة ممكن نعملها بالفراخ..

[ندعوك للتسجيل في المنتدى أو التعريف بنفسك لمعاينة هذه الصورة]
الفراخ على الطريقة التايلاندية

المقادير:

كيلو إلا ربع صدور أو أوراك فراخ مقطّعة لقطع صغيرة
2 : 3 ثمرات بطاطس مقطّعة مكعبات
1/ 2 ملعقة صغيرة شطة
ملعقة كبيرة عصير ليمون
3 فصوص ثوم مفرومين
1/ 2 كوب بصل مفروم
1/ 2 كوب شوربة فراخ
3 ملاعق كبيرة كاري
2 ملعقة كبيرة زيت
ملعقة صغيرة بابريكا
ملعقة كبيرة كاتشاب
ملعقة صغيرة قرفة
كوب لبن جوز هند "هتلاقيه في أي سوبر ماركت"
ملعقة صغيرة سكر
ورق لاورا

الطريقة:

1- هاتي طاسة كبيرة وحطّي فيها الكاري والبابريكا وورق اللاورا والقرفة والشطة وحمّصيهم على النار لمدة دقيقة.

2- بعد كده ضيفي الزيت والبصل والثوم والزنجبيل، وحطّي معاهم شوية من شوربة الفراخ على قد الخليط اللي إنتي حطيتيه؛ علشان يساعد إنها تتطبخ كويس، وسيبيهم على النار لمدة دقيقة.

3- حطّي الفراخ والبطاطس وقلّبيهم كويس مع الخليط، على النار لمدة دقيقة أو لحد ما الفراخ تتشرب من الخليط.

4- ضيفي باقي شوربة الفراخ والكاتشاب على الخليط، وقلّبيهم كويس لحد ما الخليط كله يتجانس مع بعضه، وبعدين حطّى لبن جوز الهند والسكّر.

5- انقلي الفراخ في صينية أو قالب بغطاء وحطّيها في الفرن لمدة كافية على درجة حرارة 350، وبعد كده طلّعيها من الفرن، ورشّي على الوش عصير الليمون.. وبالهنا والشفا.

ملحوظة:

ممكن تزوّدي شطة أو قطع فلفل حار لو عايزاه سبايسي أكتر، ولو هي حامية ممكن تزوّدي شوية لبن جوز هند أو زبادي، ولو طلعت مززة شوية ممكن تزودي سكر، يعني تقدري تظبطيها على حسب ذوقك.

*******************

[ندعوك للتسجيل في المنتدى أو التعريف بنفسك لمعاينة هذه الصورة]

الفراخ على الطريقة المكسيكية

المقادير:

3 شرائح صدور فراخ مقطّعة مكعبات
فلفل أحمر حار مقطّع
كوب صلصة طماطم
كوب كريمة طبخ "هتلاقيها في أي سوبر ماركت"
1/ 4 كوب كزبرة خضراء مفرومة للتزيين
2 ملعقة بابريكا
3 ملاعق ملح
2 ملعقة كمون
ملعقة زبدة
فص ثوم

مقادير التتبيلة:

كوب زبادي
4 ملاعق ملح
ملعقة زنجبيل
ملعقة صغيرة قرفة
ملعقة عصير ليمون
2 ملعقة فلفل أسود
2 ملعقة صغيرة شطة
2 ملعقة صغيرة كمون

الطريقة:

1- اخلطي كل مكونات التتبيلة في طبق كبير وحطّي الفراخ معاهم، وقلّبيهم كويس أوي، وبعد كده غطّي الطبق وحطّيه في الثلاجة لمدة ساعة.

2- سخّني الطاسة أو الجريل جامد وحطّي فيه شوية زيت صغيرين، وحطّي قطع الفراخ في أسياخ الشوي، وشوّحيها على الجريل لمدة 5 دقائق.

3- سيّحي الزبدة في طاسة كبيرة وشوّحي الثوم مع الفلفل الأحمر الحار لمدة دقيقة، وبعدين تبّليه بالكمون والملح والبابريكا.

4- بعد كده ضيفي عليهم الكريمة وصلصة الطماطم، وسيبيها تغلي على نار هادية لمدة 20 دقيقة أو لحد ما الصوص يبقى سميك.

5- حطّي قطع الفراخ مع الخليط ده وسيبيها لمدة 10 دقائق، وعند التقديم ممكن تزيّني الطبق بالكزبرة والفلفل الأحمر.. وبالهنا والشفا.

شكررا يعطيك العافية

» كفتة الفراخ
» أبلما الفراخ (طبق لبناني)
» فتة الفراخ بصلصة اللبن والثوم
» فيليه الفراخ بحشو السبانخ والمشروم
» فطيرة الفراخ بطريقة سهلة وسريعة