المكسرات لصحة ونضارة بشرتك.. والفجل لمشاكل الثدي الصغير

هنتكلّم النهارده عن صحة جلدنا وبشرتنا في رمضان، وهنعرف إزاي نخرج من الشهر الكريم بدون ما الصيام يسبّب جفاف لبشرتنا، كل ده هنعرفه مع د. إعتدال أبو السعود استشاري الجلدية والتجميل.

كتير من البنات بيبقى عندها قلق إن الصيام ممكن يأثّر على بشرتها بالسلب، خصوصا لو فرحها هيبقى على العيد مثلا، وعايزة تحافظ على نضارة بشرتها؛ إزاي نتجنّب المشكلة دي؟
عايزة أقول لكم إن الشهر ده من أفضل الشهور للبشرة؛ لأنه فيه عادات غذائية سليمة جدا، بس لو مشينا عليها بشكل صحيح ومظبوط هنخرج من الشهر ببشرة سليمة وصحية، لكن لو أسأنا استخدامها هتعود علينا بالضرر.

وبالنسبة للعطش فهو إحساس بالحرمان أكتر منه عطش فعلا؛ يعني معظم الناس ممكن تستمر فترة طويلة بدون ما تشعر بالعطش أو تشرب ميه، ولكن مع الصيام والإحساس بالحرمان لمدة طويلة ممكن تصل لـ12ساعة مثلا بنحس بالرغبة الشديدة لشرب الميه.

وعلشان كده إحنا بنهتم جدا بشرب الميه والسوايل بكترة في رمضان؛ علشان نعوّض ساعات الصيام دي، وده طبعا بيأثر بالإيجاب على البشرة وعلى الصحة.

فيه دراسات كتيرة عالمية أثبتت إن نظام الصوم له فوائد لأمراض كتير ومنها الأمراض الجلدية، يا ريت توضّحي لنا إزاي الصيام ممكن يعالجها؟
الموضوع ده صحيح، ويمكن من أكتر الدول اللي عملت دراسات في الموضوع ده هي ألمانيا واليابان، وبالنسبة لليابان فهي اشتغلت على نظام الأكل في رمضان، ووجدت إن الأكل الصحي بيبقى وجبتين فقط في اليوم، كنوع من التنظيم الغذائي الجيد والصحي للجسم.

كمان ألمانيا عملت أبحاث كتير تخص عادات عندنا؛ زي أكل التمر، واللبن بالتمر، والزبادي والعسل، وعلى الياميش كمان زي: المشمشية المجففة، وقمر الدين، والقراصيا، والتين المجفف، الحاجات دي بيكون فيها مضادات للأكسدة قوية جدا لو استخدمناها بشكل صحيح.

ولازم نبقى عارفين الفرق بين إننا ناكل فاكهة طازة والفاكهة وهي مجففة؛ لأن كل نوع بيكون له فوايد مختلفة، والفاكهة المجففة بتحتوي على نسبة عالية من مضادات الأكسدة، ودي اللي بتحافظ على نضارة وحيوية البشرة لفترات طويلة، بالإضافة إلى إنها بتعوّضنا عن بعض الأكلات وبتخلّص الجسم من السموم، وبتكسر المواد الزيادة في الجسم من الأكل، يعني مثلا في السن بعد الأربعين ماينفعش ناكل أكلات دسمة زي القشطة، وعلشان نكسر من حدتها ممكن ناكل بعدها بقدونس؛ لأن ده بيدوب الدهون الزايدة في الجسم.

هل نظام الصيام ممكن يساعد إنه يحسّن من فاعلية أدوية معينة للبشرة؟

أفضل أوقات لتناول الفيتامينات هي وقت الفجر أو الصبح، وكمان فيه مواد بنتناولها علشان تساعد على النمو ودي بناخدها في المغرب، وفي رمضان بنتناول المواد والفيتامينات دي في شكل مواد بروتينية زي اللحوم والفراخ، ودي الحاجات اللي بنتناولها في الفطار بس في نفس الوقت مش عايزة الناس تكتّر من اللحوم؛ لأنها بتسبب النقرس، وكمان ممكن تضرّ الكلى اللي بدورها بتسبب تساقط الشعر، وكمان بيأثّر على البشرة، وعلشان كده مهم إننا نتناول منها بس بكميات مناسبة لنا علشان ما نضرّش نفسنا.

إيه هو أفضل روتين لتناول الأكل في رمضان؟

الروتين الجيد في رمضان هو إننا نتناول فطارنا المكوّن من الشوربة وطبق سلطة بخضراوات فريش وقطعة البروتين، ونكتفي بالأكل ده لحد الساعة 12 بالليل بدون ما نتناول أي سكريات، بكده نكون ضمنّا إن هرمون النمو نشط، وده اللي بيبقى مسئول عن تجديد خلايا البشرة، وطول الشعر، وطول الأظافر، وتجديد خلايا المخ والرئة للناس المدخنة.

بعد كده في وقت السحور نقدر نتناول مواد سكرية ومواد منشّطة علشان تساعدنا في فترة النهار زي التمر باللبن، والتمر ده ليه فوايد كتير جدا، ولو تناولنا 7 تمرات على مدار اليوم هتكون كافية جدا؛ لأنها منشّطة وبتدي طاقة للجسم ومضاد هايل للاكتئاب، وبعد كده هنتناول الزبادي وده بيساعد في الهضم وكمان بيزوّد المناعة.

الروتين ده بيساعد إن الجلد والبشرة تتحسّن، وكمية الميه اللي هتختزن تحت الجلد بتتحسن من شرب الميه سواء من الشوربة أو السلطات العادية أو من العصاير؛ لكن على شرط إننا ننفذ تعاليم الإسلام وهو الثلث للميه والثلث للأكل والثلث للنفس، ونحافظ إننا ناكل بهدوء وتأنّي، وندي لنفسنا وقت كويس في المضغ والأكل.

طبعا أكل المكسرات بيزيد في رمضان وبنات كتير بتخاف إنها تكتّر منها؛ لأنها بتحتوي على نسبة دهون عالية، ودي ممكن تأثّر بالسلب على الوزن والبشرة، فهل هي لها تأثير إيجابي أو سلبي؟
أهم حاجة هي فكرة الاعتدال أو التوازن في الأكل؛ يعني مثلا ممكن البنات تتناول 3 حبات عين جمل في اليوم علشان تمد الجسم بالأوميجا 3.

وبالنسبة للوز هو فيه نسبة دهون أعلى شوية من عين الجمل وممكن يكتفوا بحبتين فقط، لكن لو هنتناول قطعة كنافة محشية بالمكسرات فدي تعتبر وجبة في حد ذاتها، ودي ممكن نتناولها الساعة 12 بالليل؛ لأن ماينفعش نتناولها بعد السحور علشان ماتسببش الإحساس بالعطش تاني يوم، وكمان ماينفعش نتناولها بعد الفطار؛ لأننا لازم نعمل فاصل بين الفطار وبين تناول الحلويات.

وبالنسبة للياميش ممكن جدا نتناوله في وقت الفطار -زي الخشاف- بس أنا بافضل إننا نعمله من غير سكر.

والناس اللي عندها حَب شباب وكمان مَرضى الصدفية يُفضّل إنها تقلل من أكل المكسرات، وممكن بدل ده ياكلوا المشمشية أو الياميش بصفة عامة، ولكن لو مافيش أمراض جلدية نقدر نتناول المكسرات عادي، ودي بتساعد في نضارة البشرة بشكل كبير جدا.

بنات كتير بتعاني من صغر حجم الثدي، وبتخاف من عمليات التجميل؛ هل فيه حل طبيعي للمشكلة دي؟

بالنسبة للبنات اللي عندهم مشكلة في صغر حجم الثدي أو إنه بيبقى متهدّل شوية، فمن النصايح اللي بحب أقولها هو تناول المواد النباتية بشكل كبير؛ لأنها بتعوّض نسبة الأستروجين الطبيعية، ومن المواد دي الفجل لأنه فيه نسبة عالية جدا من الكالسيوم، وكمان فيه زيوت طبيعية بتستخلص من خلاص الطفل، ودي بتساعد على شد الجلد وبتخلي الثدي مشدود، من غير ما يتدخل في الهرمونات ولكن دي بتبقى زيوت من مواد معينة بتصنع دوليا، وفيه كمان زيوت بسيطة طبيعية ممكن البنات تستخدمها لأنها مفيدة للجلد، زي زيت اللوز الحلو وده من الزيوت الحلوة وممكن نستخدمها في إزالة الماكياج وبتمنع النمش، وزيت اللوز فيه منه نوعين، نوع مر وده بيستخدم لتنبيت الرموش.

بالنسبة للبنات اللي هيكون فرحهم بعد رمضان، تنصحيهم بإيه؟

أنا بانصح كل بنت إنها ماتعملش أي ماسكات غير طبيعية لبشرتها، وتستغل رمضان في إنها تشرب كمية كبيرة جدا من المية مش أقل من 4 لتر في اليوم بما يعادل 12 كوب كبير، كمان تهتم بتناول الفاكهة بكميات كبيرة، وفاكهة الصيف مفيدة جدا؛ زي: العنب سواء تناولناه أو دلكنا بيه بشرتنا؛ لأنه بيعتبر مقشر طبيعي للبشرة.

والطريقة الصحيحة لتناول الفاكهة هي قبل الأكل بساعتين، أو ممكن بعد الأكل بساعتين ناكل كمية كويسة من الفاكهة، ودي هتعمل انتعاشة للبشرة وللنفس كمان وهتريح المعدة.

بعد كده تبدأ تعمل الماسكات الطبيعية، زي ماسك بذرة القطون، ودي بنجيبها من عند العطار وبنعمل منها ماسكات يوم بعد يوم، وفيه كمان الكريز والتوت والفراولة، ودي حاجات بتدي حمرة للبشرة، بناخد منها كمية ونخلطها مع بياض بيضة وملعقة عسل، ونحطها على الوش والرقبة والأكتاف والأذرع.

وممكن نستغل الزبادي في ماسكات للشعر، هنجيب كوب زبادي بس يكون بايت، ونضيف عليه صفار بيضة ونصف ملعقة عسل ونصف ليمونة، ونضربهم كويس ونعمل بيهم ماسك للشعر مرة كل أسبوع، وده بيدي نضارة وطراوة طبيعية للشعر.

وبالنسبة لو عايزة تعملي ريجيم فزي ما قلنا إن وجبتين هيبقوا ريجيم كويس جدا، بس لو مشينا على النظام مظبوط، وأهم حاجة إننا ناكل طبق السلطة قبل الأكل بربع ساعة تقريبا، وبعد كده مهما كانت نسبة الكربوهيدرات اللي هناكلها الجسم مش هيمتص غير نسبة بسيطة؛ لأن الخضراوات بتنشط إفراز الإنزيمات اللي بتمنع امتصاص الكربوهيدرات.

بالنسبة لموضوع إزالة الشعر بالليزر هل له علاقة بشهر رمضان؟

موضوع إزالة الشعر له علاقة أكتر بمواسم السنة؛ يعني في وقت الخريف أو الشتاء بيبقى أحسن وقت لعملية إزالة الشعر؛ لأنه بيبقى أبطأ في النمو وبيبقى في حالة ضعف عام، وأنا بافضل إن العروسة تعمل إزالة للشعر قبل الفرح بشهر؛ لأن عملية إزالة الشعر بتحتاج أكتر من جلسة، وفي وقت الشتاء أو الخريف ممكن نكرر جلسات الإزالة كل شهر ونصف بدل من شهر، إنما في الصيف بيكون نموه أسرع.

وموضوع الإزالة بالليزر له درجات مختلفة وفيه إزالة نهائية وبتتعمل في جلسات على 6 شهور حسب الموسم، ودي مالهاش أي آثار جانبية، وأنا بانصح إن لو البنت هتعمل إزالة بالليزر إنه كل ما كان في وقت مبكر هيكون أسهل والمساحات بتكون أصغر.

» السلطان الصغير
» عصاير وكوكتيلات لجمال بشرتك
» وصفات طبيعية.. لو بشرتك دهنية!
» 4 استراتيجيات تعيد الشباب إلي بشرتك
» الكافيار .. مزاياه عديدة لتغذية بشرتك