أكلات عيد الأضحى على كيف كيفك

طبعاً كلنا عارفين إن عيد الأضحى بيحلى في لمة العيلة على السفرة على أطباق الفتة، ويا سلام على حفلات الشوي اللي بتتعمل بالليل، ما فيش أحلى من كده..

وأكيد طبعاً نفسك في مرة تبيّني لأسرتك إنك ست بيت شاطرة وتدخلي المطبخ وتعملي الأكل بنفسك، بس كل مرة بتخافي علشان ما بتعرفيش تطبخي كويس وخايفة الأكل يبوظ وكل اللي قاعدين يضحكوا عليكِ..

بس ولا يهمك مِن حاجة طول ما إحنا موجودين؛ لإننا قررنا إننا نقدّم لكِ أكتر من طريقة لعمل الفتة، بالإضافة إلى أكتر من طريقة جديدة لعمل اللحمة الضاني..

يلّا بينا على المطبخ...

________________________________________
________________________________________

فتة بالخل والثوم

أوّل طبق معانا النهارده هو طبق الفتة بالخل والثوم؛ وده لأن ما فيش حد في مصر كلها ما بيفطرش فتة في أول يوم العيد.. ودي أحسن طريقة ممكن إنك تعملي بيها الفتة في العيد..

المقادير:
• كيلو لحمة ضأن.
• 3 أكواب أرز.
• بصلة كبيرة ومقطعة قطع صغيرة.
• بصلة كبيرة مقسومة نصفين.
• 2 فص حبهان.
• ملعقة قرنفل.
• 6 فصوص ثوم مفرومة.
• 2 رغيف خبز محمص.
• نصف ملعقة صغيرة مبشور جوزة الطيب.
• أعواد قرفة.
• ورق لاورا.
• ملح.
• كوب كبير عصير طماطم.
• ملعقة كبيرة سمن.
• ملعقة كبيرة صلصة طماطم.
• ملعقة خل أبيض.[/color]

الطريقة:

1- اسلقي اللحمة الضاني وضيفي إليها عند السلق البصلة المقسومة نصفين وورق اللاورا وفص الحبهان وملعقة القرنفل والملح وسيبيها لغاية ما تستوي.

2- أثناء ما اللحمة بتستوي أحضري الأرز واغسليه، وأحضري صينية متوسطة الحجم وحطيها على النار وحطي فيها ملعقة ونصف سمنة، وضيفي إليها الأرز وقلبيه على النار لمدة خمس دقائق، بعد كده أحضري ماء وضيفي إليه شوية ملح وضيفيه للأرز وسيبي الأرز على نار هادية لغاية ما يستوي مع التقليب من وقت للتاني.

3- أثناء ما الأرز بيستوي أحضري بصلة وقطعيها قطع صغيرة وحمّريها في السمنة لغاية ما تلاقي لونها بقى أصفر، ضيفي إليها الثوم مع التقليب لمدة خمس دقائق، بعد كده ضيفي إليهم كوب عصير الطماطم والصلصة ومعلقة الخل وسيبيهم على نار هادئة لمدة 10 دقائق، بعد مرور عشر دقائق ضيفي إليهم كوب من الشوربة وقطع اللحمة وسيبيهم على النار لمدة ربع ساعة.

4- أحضري صينية وقطعي فيها الخبز المحمص، وضيفي إليه شوربة اللحمة وسيبيهم لمدة عشر دقائق علشان العيش يتشرّب من الشوربة.

5- أحضري طبق كبير وحطي فيه الأرز والخبز ومن فوقهم الصلصة واللحمة... واوعي تأكلي صوابعك وراها.

________________________________________

فتة بالزبادي والثوم

أما لو كنتِ عايزة تبيني للكل إنك ست غير تقليدية، وفي نفس الوقت تعملي فتة؛ يبقى عليكِ وعلى الفتة بالزبادي والثوم، وعلى فكرة طبق الفتة ده مشهور أوي في الشام...

المقادير:

• كيلو لحم ضاني أو بتلو مقطعة قطعاً متوسطة الحجم.
• 2 رغيف شامي محمص.
• ربع كوب طحينة.
• 5 عبوات زبادي.
• 5 فصوص ثوم مفرومة.
• بصلة كبيرة مقطّعة شرائح رفيعة.
• ورق لاورا.
• 2 حبة حبهان.
• نصف كوب صنوبر "اختياري".
• 3 أكواب أرز بسمتي.
• 2 ملعقة كبيرة سمنة.
• 1 كوب خل.
• ربع كوب عصير ليمون.
• ربع كوب زيت ذرة.
• ملعقة صغيرة بهارات.
• ملح وفلفل.

الطريقة:

1- أحضري العيش الشامي وقطّعيه قطعاً متوسطة الحجم، وحمصيه في الفرن لمدة عشر دقائق، أثناء ما العيش بيتحمّص في الفرن أحضري الصنوبر وحمّريه في الزيت أو حمصيه هو كمان في الفرن.

2- أحضري حلة كبيرة وحطي فيها معلقة سمنة وسخنيها على النار، وضيفي إليها البصل وقلبيه على النار لمدة ربع ساعة أو لغاية ما تلاقي إن البصل لونه أصفر ضيفي إليه نص كمية الثوم المفروم اللي عندك، وقلبيهم مع بعض لمدة خمس دقائق كمان.

3- بعد مرور خمس دقائق ضيفي إليهم قطع اللحمة، وقلبيهم مع بعض لمدة ربع ساعة أو لغاية ما تلاقي إن اللحمة لونها أتغيّر من اللون الأحمر إلى اللون البني، ضيفي إليها ماء وملح وبهارات وورق لاورا وحبهان، وسيبيها على النار لمدة نص ساعة أو لغاية ما اللحمة تستوي.

4- في الوقت اللي فيه اللحمة بتستوي أحضري الأرز واغسليه وبعد كده أحضري صينية وحطي فيها معلقتين سمنة واستني لغاية لما السمنة تسخن، وضيفي إليها الأرز وقلبيه على النار لمدة خمس دقائق، بعد كده أحضري ماء وضيفي إليه شوية ملح وضيفيه للرز وسيبيه على نار هادية لغاية ما يستوي.

5- أثناء ما الأرز بيستوي أحضري الزبادي واخلطيه بالطحينة وباقي كمية الثوم اللي عندك وعصير الليمون وربع معلقة صغيرة من الملح والفلفل وقلبيهم كلهم مع بعضهم كويس.

6- أحضري طبق باريركس كبير وحطي فيه الخبز المحمص، وضيفي إليه شوربة اللحمة واستني خمس دقائق، وبعد كده ضيفي إليه الزبادي والأرز وقطع اللحمة والصنوبر وشوية شوربة لحمة، ودخليه الفرن لمدة عشر دقائق وبعد كده خرّجيه... وبألف هنا وشفا..

________________________________________

كبسة باللحمة والأرز

أما لو كنتِ عايزة تاكلي فتة على الطريقة السعودي؛ يبقى عليكِ وعلى الكبسة السعودي.. ودي طريقتها..

الطريقة:

• كيلو لحمة ضاني مقطعة قطعا متوسطة الحجم.
• 3 حبات بصل مقطعة شرائح.
• 4 أكواب أرز بسمتي.
• 5 أكواب ماء.
• ربع كوب زيت ذرة.
• 3 ثمرات طماطم مقطعة قطعا صغيرة.
• ورق لاورا.
• 3 حبات حبهان.
• 3 أعواد قرفة "متوفر عند العطار".
• ملح وفلفل وبهارات.
• حبات ليمون ناشف "متوفر عند العطار".
• مكسرات محمرة "اختياري".

الطريقة:

1- سخني الزيت في حلة وضيفي إليه البصل وقلّبيه على النار لمدة عشر دقائق أو لغاية ما تلاقي إن البصل لونه بقى أصفر، ضيفي إليه اللحمة والليمون الناشف والبهارات وورق اللورا والحبهان وأعواد القرفة والملح والفلفل والطماطم وقلبيهم كلهم مع بعض على النار لمدة عشر دقائق أو لغاية ما تلاقي إن اللحمة لونها أتغيّر من اللون الأحمر إلى اللون البني.

2- لما تلاقي إن اللحمة لونها بقى بني ضيفي إليها كوب كبيرة من الماء، وسيبيها على نار هادية لمدة ساعة أو لغاية ما اللحمة تستوي.

3- بعد ما اللحمة تستوي أحضري الأرز واغسليه وبعد كده أحضري الصينية اللي هتعملي فيها الأرز وحطي فيها ملعقة ونصف سمنة، وبعد كده ضيفي إليها الأرز وقلبيه على النار لمدة خمس دقائق بعد كده ضيفي إليها شوربة اللحمة.

4- أحضري طبق كبير وحطي فيه الأرز ومن فوقه قطع اللحمة، والمكسرات المحمرة.. وبألف هنا وشفا.

بعد ما عرفنا أكتر من طريقة لعمل الفتة، تعالوا دلوقتي نعرف أكثر من طريقة لعمل طبق الغذاء في العيد...

________________________________________

مشويات مشكلة

دي أحسن طريقة ممكن إنك تعمليها علشان تحصلي على طبق مشوي مشكل في منتهى الجمال..

المقادير:

• كيلو لحم ضأن مقطعة قطعا متوسطة الحجم.
• كيلو لحم ضأن مفرومة.
• كيلو ريش ضاني.
• 5 بصلات مقطعة مفرومة.
• نصف حزمة بقدونس مقطعة قطع صغيرة جدا.
• ملح وفلفل وبهارات لحمة.
• 5 حبات فلفل أخضر.
• 5 بصلات صغيرة الحجم.
• 5 حبات طماطم متوسطة الحجم.
• شرائح ليمون "للتزيين".
• أوراق بقدونس "للتزيين".

الطريقة:

1- أحضري البصل وقطعيه قطعا صغيرة جدا وبعد كده ضيفي إليه الملح والفلفل والبهارات واضربيهم كلهم مع بعض في الخلاط.

2- أحضري حلة كبيرة وحطي فيها نصف مقدار البصل اللي عندك وضيفي إليه كيلو اللحم الضأن والريش وقلبيهم كلهم مع بعض كويس، دخلي الحلة في التلاجة لمدة 5 ساعات علشان اللحمة تتبل كويس.

3- أحضري حلة تانية وحطي فيها الكمية المتبقية من البصل وضيفي إليها البقدونس واللحمة المفرومة وقلبيهم كلهم مع بعضهم كويس.

4- أحضري أسياخ معدنية وابدئي في تشكيل اللحمة المفرومة على شكل أصابع حوال الأسياخ، بس خدي بالك إنك تضغطي عليها كويس علشان ما فيش حاجة تفك منك أثناء الشواء.

5- أحضري الشواية اللي عندك سواء كانت بالكهرباء أو بالفحم وابدئي في وضع أسياخ الكفتة عليها مع مراعاة التقليب بين الحين والآخر.

6- أحضري مجموعة أسياخ أخرى وابدئي في تدخيل قطع اللحم الضاني فيها والريش ضاني، وحطيها على الشواية مع مراعاة التقليب من الوقت للآخر.

7- بعد ما تخلصي شواء اللحمة أشوي الطماطم والفلفل والبصل.

8- جهزي طبق التقديم وزيّنيه بأوراق البقدونس وشرائح الليمون ورصي فيها المشويات... وبألف هنا وشفا.

________________________________________

ريش ضأن محشية سبانخ وطماطم

دي طريقة جديدة لعمل الريش الضأن في العيد ممكن إنك تجربيها وتقولي لنا على رأيك...

المقادير:

• كيلو ريش ضأني.
• كوب سبانخ مفرومة.
• نصف كوب طمامم مقطعة قطعا صغيرة.
• 1 حبة جزر مبشورة.
• 3حبات بطاطس.
• 5 فصوص ثوم مفرومين.
• ملعقة كبيرة مرامية "متوفر عند العطار".
• ملعقة كبيرة روزماري "متوفر عند العطار".
• ربع كوب زيت ذرة.
• ملعقة كبيرة خل.
• ملح وفلفل.

الطريقة

1- اخلطي السبانخ مع الطماطم والجزر ونصف كمية الثوم والروز ماري والمرامية والملح والفلفل وقلبيهم كلهم مع بعض كويس.

2- أحضري الريش وابدئي في عمل تجويف بداخلها باستخدام السكينة، واحشيها بالخليط السابق، واربطيها في النهاية كلها مع بعضها بخيط سميك.

3- أحضري البطاطس وقطعيها قطع متوسطة الحجم، وأحضري صينية وحطي فيها الزيت وضيفي إليه الكمية المتبقية من الثوم والأعشاب وقلبيهم مع بعض لمدة ثلاث دقائق، وبعد كده ضيفي إليهم البطاطس والريش والخل وقلبيهم كلهم مع بعض لمدة خمس دقائق.

4- أحضري صينية فرن وحطي فيها الريش والبطاطس ودخليهم الفرن لمدة نص ساعة أو لغاية لما الريش تستوي.

5- جهزي طبق التقديم وحطي فيه الريش... وبألف هنا وشفا.[/b]

» أكلات خفيفة
» أفيد 9 أكلات لقلبك وبشرتك
» أكلات صيامي.. هدية لكل الأخوة المسيحيين